My daughter’s friend, V. is a wise young woman and a pragmatist. She never hesitates to tell her friend what she thinks. One of her favorite aphorisms to her dear friend is…
“Ting fuh cry, you ah laff.”
or as we Guyanese might put it….
“Why some people stay suh?”
I does think bout this plenty. Now, hear nuh? We got Prezzy Biden sharing out plenty money to dem poor people what cyant pay dem bills. Ow ! he sarry fuh dem. Dem pickney guh get food and gun go back to school. I glad.
Now dis money going to everybady- Democrat and Republican – all two. They gun stretch deh haan and tek it. Most ah dem gun seh “God bless you, Joe-Boy.”
But dem namak-haram Rebuplicans? Eh? Dey gun go and kiss up Trump foot and seh how is HE mek dey get the money.
DAH is contrary.
Why some people stay suh? Eh? Why?
De wuss ting is when you got contrary pickney. When one of my brood was small, she did always contrary. People come to visit. We gyaffin. We laffin. Drinking cold drinks.
I muss tell you that like plenty ah dem Guyanese people, as soon as they gone I gun stuuups up on them.
She now pulling the lady dress. Pullin de lady dress.
“You want hear wha me muddah seh ‘bout you?”
I skin up me eye on she, but she ent see me eye yet. Next time, I shouldda duct tape up she lil koka mout.
Da is pickney turning contrary. Shaming up mankind.
Anodda time I juss leaving the house fuh ketch cyar fuh go to work. One ah dem hollering,
“I got to make ninety- six dhall puri fuh carry to school today.”
Dah is contrary. Why she tellin me NOW? Why she ent say so lass night? I couldda bile the dhall and season it up , get up early and mash the flour and leave she and the maid to do the ress.
Is so pickney does be contrary.
And then again….
Everybady who born in Guyana know that you got to FRY pholourie. Dis odda wan tell he sweet wife fuh bake the pholourie cause he ent like the oil. The bake pholourie hard like cricketball. Cricket ball does do what the bowler tell it fuh do even if is a googly. Not dis pholoutie. It haaaaard.
So come he learn quick, quick how fuh treat pholourie with respek.
Talking bout pickney what contrary, hear dis wan.
V. got two son. Waan day, she look out de window and see one of them haulin a car into the front yard.
She fly to the door.
“__ where are you going with that?”
Hear the boy. “I buy it.”
By dis time,V deh by the cyar inspecting it.
“You buy a stick gear and you cant drive stick gear cyar? Boy is wah wrang wid you?”
“Mummy, I buy a stick gear cause I ent want ___ to drive me cyar.” ( he mean he bruddah)
Dat boy real contrary, you hear.
De moddah juss leff he. Wah she cyan do? She know she got wan contrary son. But he prappa sweet.
Leh we tek a look at some contrary tings people does do and say.
Leh we start with “Ting fuh cry, you ah laff.”
Look nuh! You deh in the cinema watching de movie. How dis movie story mek you cry . You trying fuh hide eye-wata. Den de lady next to you start fuh laff . Wah she laffing fah? She shame fuh leh people know how de story mek she feel?
You see now wah ah mean? Ting fuh cry, she ah laff.
Some people know good how fuh laff when bad ting happen to oddah people .
Some ah dem see wan pickney fall down and bruk he foot and dem ah laff. You ridin’ you bicycle and you fall, them stan up laffing. Big joke. Dis time, you knee well and bruise up.
Some Guyanese people does go to dead-house and dem don’t know how fuh give sympathy. If you see how dem does mek joke with they fren… “kya kya kya” all de time as if they at a party. Nevah mine, the wife and pickney deh inside the house mourning fuh the dead fada.
De wan dem wah does mek me get vex is dem wah ALWAYS finding fault as though them want fuh show you dem know more than you. They gyaffin with you. As soon as you seh something, they open up with NO and BUT.
Contrary. Dah is wah dem is. CON-TRAY-REE
Pickney see old zinc with nail stick out. Wah he do? He walk pan de zinc.. Braddam! He fall and cut he haan to the bone (or almost). Next ting you know …….12 stitches.
He ah de same wan wah put corn in he ears and deh complaining bout ear-ache. The doctah pull out the corn almost growing leaf.
He muddah well-an-tell he how he haad-aze and contrary..
But is this waan wah does crack me up.
Guyanese people see a sign that say “NO FISHING”. Wah hard bout dat?
But, they now, they andastaan dah fuh seh “Plenty hassa deh heh. Come and throw you net.”
Is so we Guyanese people does do. Contrary as the day is long. AND……. when de police come, they saying how they going and carry de fish to LAKE CARAHEE.
I sorry fuh dat policeman, you hear.
He wan American.