CHAROW- CHAROW: A metaphor for kindness.

Listen and sing if you remember dis song.

🎶🎶🎶🎶p

Charow, charow mere bhaiya

Tum tum mein ya -tum

Bookh mere, mere bacha

Tum tum mein ya-tum

🎶🎶🎶🎶🎶🎶

She was a little bird. She did juss lay she eggs and dem hatch out into lil baby bird.
The baby dem hungry so she fly out the nest fuh go search fuh some food fuh feed them.

She fly to the garden of dis stingy, dutty ole woman. She does pelt them bird when they pick she bird peppah.
So dis day, dis mother bird fly to the tree and pick de peppah dem and fly back to she nest with the peppah and feed she baby them.

Now, this old woman see the bird pick de pepper and she make a plan fuh ketch dis bird. She put some gum on the peppah tree. When de mooma bird fly to the tree fuh get some more peppah, she stick on to the gum. She cant move. She try. How she try. She know dat she baby dem depend on she. She fighting and fluttah she wing. She heart going buddum- buddum, buddum-buddum.

De ole woman come and ketch de bird and lock she up in a cage.
She hear she baby dem crying. she heart beating fast, fast. She begging. Ow, how she crying and begging. De ole woman nat even hearing she. She plan fuh kill and cook de pore bird.

Then the bird see a maan and she start singing she sad song to the maan..

Charow charow mere bhaiya

Tum tum mein ya-tum

Bookh mere, mere bacha

Tum tum mein ya -tum

The maan hear and he know she begging he fuh help fuh she baby dem. So he go up to the old lady and he tell she,

“Ah know wah you plan. Leh me pay you fuh de peppah.”

Fuss ting, she refuse. Then he threaten she. She get friken and she hand ovah de cage and he open it and de bird fly home.

From dat day, whenever de mooma bird see dat man, she does sing she song so he know that she remember he kindness.

🎶🎶🎶🎶
”Listen to me my brother

My babies are hungry

Listen to me”.

TRIAL BY WATA

De mooma cook de food fuh dinnah and leff it over the fireside fuh stay warm till aftahnoon when dem gun eat it.
Mooma gone ah de cane field fuh cut cane.

De pickney dem deh home. Lil bit after midday, one ah dem pickney get hungry. She go to the pot and full up she dress with the rice and she and them oddah wan dem hide and eat.

When mooma come home, she see that the food eat out. De pot empty. She vex so till. She line up dem pickney before she.

“ Who eat dis food out?”

No ansah. All maan friken. Dem head bend down. Dem crying.

“Nah me.”

“Me nah eat nothing.”

“Ow mammy! Me nah know who eat de food out.”

Den she see the guilty one with rice hanging on to the clothes.
“You, you eat out dis rice. Come! Me guh teach you fuh teef.”

She throw de pickney in the rivah. Everybady line up watching.

“Tell me now if you eat de food.”

De chile friken. And she start fuh sing

🎶🎶🎶

Oh me mooma nanny,

Oh me ma

Nah me waan eat ah rice.

Guinea cack and guinea hen fly all about

Wata covah me up to me knee.”

Mooma screaming,

“Tell me if ah YOU eat de rice.”

🎶🎶

“Oh me mooma nanny

Oh me ma

Nah me waan eat ah rice

Guinea cack an’ guinea fly all about

Water cover me up to me neck.”

Everybody waiting fuh see wah guh happen.

If you see how dem pickney ah cry.

Mooma scream again.

“ You guh talk now?”

🎶

Oh me mooma nanny

Oh me ma

Ah me waan eat ah rice.

Guinea cack and guinea hen fly all about

wata covah me all ovah.”