De ring did get wan big, black stone that fix into it. People seh dat if you gat problem and you look in de stone, you does know wah fuh do. The stone does be like TV. But nah everybady can see ting in de ring, though. The pandit who own dis ring seh dat only young, lil pickney dem can see ting in dis ring.
Pandit RING-MAAN got to get pay fuh leh you see ting in this ring. Pandit is wan business man. Weekend does be busy time.
De people who live in the village got to ketch de bus and go to the stelling and wait fuh de steamah come back from the opposite bank fuh them go over de rivah. Then they gat to ketch wan bus or cyar fuh go to the village weh Pandit RING MAAN live. Laaang trip. Tek whole day fuh go and reach back home. Only important ting guh mek you leff house fuh guh to see Pandit RING MAAN.
Cha-Chee, who live in the village, had wan problem. She did saving money fuh buy wan gold necklace fuh wear to wan wedding. Well now, goldsmith come with de necklace. Cha-Chee go fuh tek out de money from the chess weh she hide it fuh give the goldsmith. Eh! Eh! Money gaan. Cha-Chee search all ovah. No money.
Trouble in the house now. Cha-Chee call husband, pickney, neighbor. All bady seh dem nah know nothing bout no money. Cha-Chee tie up she head-kerchief and put the knot in front over she forehead and she wailin and cryin and beatin she chess till afternoon. By this time, goldsmith gone he way with the necklace cause he know payment nah deh.
Ovah night, Cha-Chee hit on a plan. She gun go to Pandit RING MAAN fuh see is WHO teef she money. She dress she lil daughtah and she self, ketch cyar, cross de rivah with the steamah, ketch wan next cyar and go to Pandit house.
Pandit RING MAAN start asking all kine ah question.
Where dis money did hide. Who and who know bout it. How much people live in the house. Who does come, come in de house. If she see anybady spend money.. And swan, and swan.
Pandit put on de ring on he right index fingah and then he call de pickney in front ah he.
He seh “Tink about wah happen to you mooma and look in this stone and tell me wah you see.”
Cha-Chee lean forward waiting fuh hear who gun get it from she.
Pandit seh, “Talk wah you see.”
De pickney start fuh talk. “Me see ………(she call she bruddah name) open Ma chess and tek out wan ‘kerchief wah tie up. Look he put am in he pants pocket. Look he closing de chess.
Cha-Chee mout open big. Cha-Chee get up. Cha-Chee haul up de pickney and leff RING MAAN house. No money fuh RING-MAAN. Cha-Chee gone fuh deal with the thieving son.
It’s funny how Cha-chee get rob and she she self end up robbin’ Pandit Ring- Man. But you know what they say….two teef mek God laff.
What I want is to hear what happ’n when cha chee got back home! What brooms and words flew, who got ning ning, what did the neighbors hear that evening. Please tell.
What kinda Pandit was this man? He was definitely an obeah man. I am glad he didn’t get any money from Chachi, hahaha! Nicely told!